ပန်းနွယ်ကစိမ်း

ပန်းနွယ်ကစိမ်း

မမလေးဖို့ ပန်စရာ
ပျိုတို့မောင် တောင်ပေါ်ရိုးက
ပန်းချိုးလို့လာ။
အပွင့်ရယ်ဝါ
အညှာမှာမြရည်လိမ်းတယ်။
ပန်းနွယ်ကစိမ်း။

ရေးသူရဲ့ အမည်ကိုမသိရတဲ့ ကဗျာကောင်းလေးတွေထဲက တစ်ပုဒ်လို့ ဆိုရပါလိမ့်မယ်။

ကဗျာတွေမှာ အနည်းနဲ့အများဆိုသလို အသိရခက်မှုတွေ၊ လျှို့ဝှက်ဖွဲ့ဆိုမှုတွေ၊ အဓိပ္ပါယ်အမျိုးမျိုးထွက်စေမှုတွေ ရှိတတ်ပါတယ်။ ကဗျာဆရာဟာ အသိရခက်မှုတွေနဲ့ စာဖတ်သူကို တွေးစေပါတယ်။ လျှို့ဝှက်ချက်တွေကို ကဗျာထဲမှာ တကယ့်ကို စိတ်ရှင်းရှင်းမြှပ်နှံထားခဲ့ပါတယ်။ အသိရခက်မှုရော လျှို့ဝှက်ချက်တွေရောဟာ ကဗျာဆရာက ကဗျာဖတ်သူကို တနည်းနည်းနဲ့ အရယူဖို့ ပေးခဲ့တာတွေပါပဲ။ ဒါပေမယ့် အဓိပ္ပါယ်ဖြန့်ထွက်စေခြင်းကတော့ တစ်ဖက်သတ် စီးကြောင်း မဟုတ်ပါဘူး။ ကဗျာဆရာကပေးခဲ့တာ ဖြစ်နိုင်သလို ကဗျာဖတ်သူက အားစိုက်ဖန်တီးယူတာလည်း ဖြစ်နိုင်ပါတယ်။ တစ်ချို့စာဖတ်သူတွေရဲ့ ဖြန့်ထွက်တွေးတောမှုဟာ ကောင်းလွန်းတော့ ကဗျာဆရာကပြန်ပြီး စာဖတ်သူကို ကျေးဇူးပြန်တင်ရမလားလို့တောင် သံသယဖြစ်မိပါတယ်။

ဒီကဗျာလေးဆိုရင် တော်တော်ရိုးစင်းတဲ့ ကဗျာလေးမို့ အားလုံးလည်းနားလည်လွယ်တာကြောင့် အငယ်တန်းကလေးတွေရဲ့ဖတ်စာမှာ ထည့်ထားခဲ့တယ်ထင်ပါတယ်။
ဒါပေမယ့် ဒီကဗျာဟာ ကျွန်တော်တို့နိုင်ငံရဲ့ ဂန္ထ၀င်တေးရေးအဆိုရှင် တွံတေးသိန်းတန်ရဲ့ နှလုံးသားမြင်ကွင်းအောက်မှာတော့ အသွင်တစ်မျိုးဆောင်ခဲ့ပါတယ်။ ကဗျာရဲ့နောက်ဆုံး အစုလေးကို သက်သက်ခွဲပြီးတော့ ခံစားထားပါတယ်။ ပန်းနွယ် က စိမ်းတယ် ... တဲ့။ ပန်းနွယ် ဆိုတဲ့ စာနှစ်လုံးကို မိန်းကလေးတစ်ယောက်ရဲ့  နာမည်အနေနဲ့ ပြောင်းယူလိုက်တာပါ။ အဲဒီလိုပြောင်းမြင်လိုက်တာနဲ့ ချစ်သူပန်ဖို့ပန်းခူးခဲ့တယ်ဆိုတဲ့ ကဗျာလေးကနေ ပန်းခူးလာပေမယ့် မိန်းကလေးက အသိအမှတ်မပြုဘူး ဆိုတဲ့ ၀မ်းနည်းစရာကဗျာလေးဖြစ်သွားပါတယ်။

အပေါ်မှာ ဒီကဗျာရဲ့ ရေးသူကိုမသိရဘူးလို့ ကျွန်တော်ပြောခဲ့ပါတယ်။ ဒါပေမယ့်မသေချာပါဘူး။ တယောက်ယောက်က သေသေချာချာပြောနိုင်ရင် သိပ်ကောင်းမှာပါ။ ဒီကဗျာကို ကျွန်တော်စတွေ့ဘူးတာက မူလတန်း ကျောင်းသားဘ၀ ဖတ်စာအုပ်ထဲမှာပါ။ အတန်းငယ်တွေကိုသင်တာမို့ ကဗျာဆရာနာမည်ကို မဖော်ပြလေသလားလို့ သံသယဖြစ်မိပါတယ်။ ‘ပန်းငွေမိကျောင်း’ တို့လိုနာမည်ကြီးကဗျာတွေမှာတောင် ‘ဦးကြင်ဥ’ နာမည်ပါရဲ့လား မသေချာပါဘူး။ မြန်မာစာမှာနှံ့စပ်တဲ့သူတစ်ယောက်ယောက်က ပြောပေးနိုင်ရင် တကယ်ကျေးဇူးကြီးလှပါတယ်။

နောက်ဆုံးအနေနဲ့ ဒီကဗျာလေးနဲ့ပတ်သတ်ပြီးပြောချင်တာကတော့ ဒီကဗျာလေးကိုဖတ်တိုင်း ကျွန်တော်သတိရမိတဲ့ နောက်ကဗျာတစ်ပုဒ်ပါ ဒါမှမဟုတ်သီချင်းတစ်ပုဒ်ပါ။ Greensleeves တဲ့။ နာမည်က ‘အစိမ်းရောင် အင်္ကျီလက်နားစ’ လို့ဘဲ တုံးတုံးတိတိဘာသာပြန်ရမယ်ထင်ပါတယ်။ ၁၅၀၀ ခုနှစ်ပတ်ဝန်းကျင်လောက်က အင်္ဂလန်ဘုရင် Henry VIII ဟာ မင်းသမီး Anne ရဲ့ ငြင်းပယ်ခြင်းကိုခံရချိန်မှာ ရေးဖွဲ့ခဲ့တာလို့ အများစုက ဆိုကြပါတယ်။ အစိမ်းရောင်လက်နားစတွေက ငါ့ရဲ့ ပျော်ရွှင်မှု ငါ့ရဲ့ဝမ်းမြောက်မှု ငါ့နှလုံးသားပါပဲ လို့ သူရေးထားပုံကလည်း တစ်မျိုးလှပါတယ်။

Greensleeves was all my joy
Greensleeves was my delight,
Greensleeves was my heart of gold,
And who but my lady greensleeves.

နောက်ပိုင်းမှာ Henry ဟာ Anne ကို လက်ထက်နိုင်ခဲ့ပြီး နာမည်ကျော် Elizabeth I ကိုမွေးခဲ့ပါတယ်။ နောက်ပိုင်းတော့ Henry ဟာ Anne ကို အပြစ်အချို့ကြောင့်ခေါင်းဖြတ်သတ်စေခဲ့ပါသတဲ့။ ကျွန်တော်ကတော့ ရှုပ်ထွေးလှတဲ့ သူတိုရဲ.ဇာတ်လမ်းတွေကြားက နူးညံ့သိမ်မွေ့လှတဲ့ Greensleeves ကဗျာလေးကိုဘဲ မမေ့နိုင်အောင် ဖြစ်မိပါတယ်။ တစ်ချိန်ကတော့ ချစ်လွန်းလို့ ဒီလိုကဗျာတောင်ရေးခဲ့တယ်၊ သတ်စရာရှိတော့လည်း သတ်တာပါပဲလို့လည်းတွေးမိပြန်ပါတယ်။ အဲသလိုစပြီးတွေးမိခါစကဆို Greensleeves သီချင်းသံဟာ ကျွန်တော့်နားထဲမှာ ‘အချစ်’ ဆိုတဲ့စကားကို လှောင်နေသလိုဘဲ။ နောက်ပိုင်းကျမှ တစ်မျိုးဆင်ခြင်ကြည့်မှပဲ Greensleeves ကို Greensleeves လိုမြင်နိုင်ပါတော့တယ်။ ဂရိတွေရဲ့ ယုံကြည်မှုအရ ဂီတ (Music) ဟာ Muses နတ်သမီးကိုးပါးရဲ့ ဖမ်းစားခြင်းကနေလာပါသတဲ့။ နောက်ဘယ်သူလဲဆိုတာတော့မမှတ်မိတော့ပါဘူး။ သူကတော့ အနုပညာဆိုတာ နှလုံးသားထဲကနေ အပြင်ကို ပုံသဏ္ဍာန်တစ်ခုနဲ့ ရောက်လာတာနဲ့ တစ်ပြိုင်နက် ဘယ်သူနဲ့မှမဆိုင်တော့ဘူးတဲ့။ ဥပမာအနေနဲ့ အခန်းဆက်ဝတ္ထုရေးဆရာတွေဟာ တစ်ခါတစ်လေ ပရိသတ်အလိုအတိုင်း ဇာတ်သိမ်းပေးလိုက်ရတာတွေ တစ်ချို့အဆိုတော်တွေ ကိုယ့်သီချင်းကိုယ်ပြန်ဆိုပြီး နာမည်ပျက်ရတာတွေပါ။ ကျွန်တော်တို့ နားလည်ထားတဲ့ ပိုင်ဆိုင်ခွင့် ဥပဒေကိစ္စတွေကတော့ တစ်မျိုးပေါ့လေ။ နောက်တစ်ခုက Henry ကိုရက်စက်တယ်လို့စွပ်စွဲချင်ဦးတော့ Anne ကို အဆုံးစီရင်ခဲ့တဲ့ အချိန်နဲ့ အဲဒီနောက်ပိုင်း သူ့နှလုံးသားကို ကျွန်တော်တို့မှမသိနိုင်ဘဲ။ အဲဒီခေတ်က လူတွေလည်းမသိနိုင်ပါဘူး။ သူကိုယ့်သူသိမယ်လို့တောင် မသေချာပါဘူး။ ကျွန်တော်တို့လူ့သဘာဝမှာက ကိုယ့်နှလုံးသားကိုယ်တောင် အကြောင်းတိုက်ဆိုင်မှ မြင်ရတတ်တာဆိုတော့ ... ။